Не так даўно, каб адправіць ліст у суседні горад, трэба было пісаць на паперы ручкай і несці канверт на пошту, разлічваючы на некалькі дзён дастаўкі. Сёння, калі ёсць е-mail і мабільныя тэлефоны, не трэба нават уставаць з крэсла, проста націснуў кнопачку - і ліст праз пару секунд у адрасата, нават калі ён знаходзіцца за акіянам. Для здзяйснення плацяжоў хадзіць у банк сёння таксама не абавязкова. Навошта, калі ёсць інтэрнэт-банкінг, які дазваляе кіраваць сваімі грашовымі сродкамі, якія знаходзяцца на рахунку ў банку, не выходзячы з хаты, з любой кропкі зямнога шара, у любы час сутак.
Што такое інтэрнэт-банкінг
Інтэрнэт-банкінг – гэта адна з формаў дыстанцыйнага банкаўскага абслугоўвання, тэхналогія, якая дазваляе кліенту атрымаць доступ да ўсіх яго банкаўскіх рахункаў і кіраваць імі самастойна з кампутара, які мае доступ у інтэрнэт.
Перавагі інтэрнэт-банкінгу
• Эканомія часу
Гэта самая відавочная перавага выкарыстання інтэрнэт-банкінгу. Вам не трэба дабірацца ў банк, стаяць у чарзе, марнаваць час на зваротны шлях. У любы зручны для вас момант вы можаце атрымаць доступ да вашых рахункаў і здзейсніць любую аперацыю, не выходзячы з хаты.
• Эканомія грошай
Дзякуючы інтэрнэт-банкінгу банкі эканомяць на выдатках на арэнду памяшканняў, заробак супрацоўнікаў, тэхніку, канцылярыю ... Лагічна, што банкі зацікаўлены ў распаўсюджанні інтэрнэт-банкінгу – і таму яны прапануюць «самастойным» кліентам разнастайныя бонусы. Калі, да прыкладу, у аддзяленні банка кліент павінен заплаціць камісію за які-небудзь плацёж, то, магчыма, у інтэрнэт-банкінгу такой камісіі не будзе, альбо яна будзе прыкметна ніжэйшай. Калі праз інтэрнэт-банкінг адкрываецца дэпазіт – то больш прывабнай будзе даходнасць. Калі самастойна афармляецца заяўка на выпуск новай карты - гэта таксама абыдзецца танней, чым праз аддзяленне. І так па многіх іншых банкаўскіх паслугах.
• Кругласутачны доступ
Атрымаць доступ да ўсіх сваіх рахункаў і аперацый можна ў рэжыме 24/7. Спатрэбілася заплаціць за тэлефон у навагоднюю ноч? Без праблем. Інтэрнэт-банкінг працуе без святаў і выхадных.
Магчымасці інтэрнэт-банкінгу
Сёння праз інтэрнэт-банкінг можна з лёгкасцю здзейсніць большасць банкаўскіх аперацый. Напрыклад:
• Атрыманне інфармацыі аб вашых рахунках, а таксама выпісак па іх
• Здзяйсненне любых плацяжоў – ад камунальных паслуг да падаткаў і ўзносаў
• Пераводы паміж картамі, у тым ліку паміж картамі, выпушчанымі ў розных банках, а часам – і ў розных краінах
• Адкрыццё і папаўненне дэпазітаў і электронных кашалькоў
• Пагашэнне крэдытаў
• Афармленне заявак на крэдыты, плацежный карты і іншыя прадукты
• Упраўленне лімітамі па карце
• Хуткая блакіроўка карты ў выпадку форс-мажора (напрыклад, страты).
Могуць быць даступныя і іншыя паслугі. Акрамя таго, праз інтэрнэт-банкінг вы заўсёды можаце азнаёміцца з актуальнымі курсамі валют, апошнімі навінамі вашага банка і атрымаць мноства іншай карыснай інфармацыі.
Як пачаць карыстацца інтэрнэт-банкінгам
Вам спатрэбіцца кампутар, падлучаны да інтэрнэту. Доступ у інтэрнэт-банкінг ажыццяўляецца праз спецыяльны сайт – у кожнага банка ён свой. Спасылку можна знайсці на сайце банка або ўдакладніць па тэлефоне. Для ўваходу спатрэбіцца ўвесці лагін і пароль. У якасці лагіна можа выкарыстоўвацца асабісты нумар пашпарта, нумар тэлефона, унікальны набор сімвалаў, прыдуманы самім карыстальнікам – гэта залежыць ад банка. Пароль кліент устанаўлівае сам. Каб зарэгістравацца ў інтэрнэт-банкінгу, трэба прайсці працэдуру самастойнай анлайн-рэгістрацыі або звярнуцца ў аддзяленне банка, які выпусціў карту. Рэгістрацыя выконваецца толькі адзін раз – пасля гэтага кліент можа карыстацца ўсімі магчымасцямі інтэрнэт-банкінгу самастойна, выкарыстоўваючы лагін і пароль.
Міжбанкавая сістэма ідэнтыфікацыі
Сёння, калі чалавек наведае адзін з банкаў і пройдзе ў ім працэдуру ідэнтыфікацыі, ён можа атрымліваць банкаўскае абслугоўванне з дапамогай лічбавых каналаў у любым банку Беларусі. Міжбанкавая сістэма ідэнтыфікацыі - гэта спецыяльная база дадзеных, якая выкарыстоўваецца для выдаленай ідэнтыфікацыі кліентаў і прадастаўлення ім паслуг з дапамогай лічбавых каналаў абслугоўвання.
Правілы бяспекі
Для інтэрнэт-банкінгу асноўныя правілы бяспекі наступныя:
• Першае правіла – перад пачаткам працы пераканайцеся, што на гаджэце усталяваны антывірус з актуальнымі антывіруснымі базамі дадзеных.
• Другое правіла – ніколі і нікому не паведамляйце вашы лагін, пароль, сеансовы ключ.
• Трэцяе правіла – не выкарыстоўвайце ў выглядзе пароля для ўваходу ў інтэрнэт-банкінг вашыя асабістыя дадзеныя, якія ёсць у любой сацыяльнай сетцы. Не выкарыстоўвайце адзін і той жа пароль для ўсіх сваіх акаўнтаў. Акрамя таго, пароль варта перыядычна мяняць.
• Чацвёртае правіла – не карыстайцеся інтэрнэт-банкінгам праз грамадскі Wi-Fi (у гэтым выпадку зламыснікі могуць падключыцца да адкрытай сеткі і атрымаць доступ да персанальнай інфармацыі).
• Пятае правіла – пры здзяйсненні плацяжоў у сетцы інтэрнэт рэкамендуецца падключыць паслугу дадатковай бяспекі 3D Secure.
• Шостае правіла – устанавіце ліміты расходавання сродкаў са свайго рахунку (па суме, колькасці аперацый, відах аперацый і інш.) Напрыклад, калі вы сапраўды ведаеце, што ў бліжэйшы час за мяжу не паедзеце – абмяжуйце магчымасць правядзення аперацый за мяжой, а таксама падключыце паслугу SMS-апавяшчэнне.
• Сёмае правіла – перад тым як уводзіць свае даныя, трэба пераканацца, што перад вамі не падробка сайта, вельмі-вельмі падобная на афіцыйны сайт, а яго сапраўдны URL-адрас (сімвалы, якія ўводзяцца ў адрасны радок браўзэра). Яны могуць адрознівацца ўсяго на адну літару або лічбу – будзьце ўважлівыя!
Прытрымлівацеся гэтых нескладаных інструкцый – і вашы грошы будуць у бяспецы.
